Եւրոպական Միութիւնը խստօրէն քննադատած է Թուրքիան` արդարադատութեան եւ մամուլի ազատութեան
մարզերուն մէջ տիրող վիճակին համար։
Թրքական «Թուտէյզ Զաման» օրաթերթը կը հաղորդէ, որ Եւրոպական Միութիւնը իր հրապարակած
զարգացման մասին տարեկան զեկուցումին մէջ խստօրէն քննադատած է Թուրքիան` արդարադատութեան
եւ մամուլի ազատութեան մարզերուն մէջ տիրող վիճակին համար: Անդրադարձ կատարելով դեկտեմբեր
2013-ին Թուրքիան ցնցած «Մեծ կաշառք» գործողութեան եւ ատկէ ետք սկսած դատական հոլովոյթներուն`
զեկուցումին մէջ նշուած է, որ ոստիկանները, դատաւորները եւ դատախազները գործէ արձակելու
վերաբերեալ որոշումները մեծապէս ազդեցին համապատասխան մարմիններու պատշաճ գործունէութեան
վրայ: Զեկուցումին մէջ կը խօսուի այն մասին, որ «Եւրոպական Միութեան ռազմավարական
գործընկեր» եղող Թուրքիոյ պետութեան մէջ լուրջ խնդիրներ կան լրատուական դաշտի ազատութեան
հետ կապուած: Կ՛ընդգծուի այն փաստը, որ զանգուածային լրատուամիջոցներուն նկատմամբ
կիրարկուող ճնշումները լուրջ գրաքննութեան պատճառ կը դառնան, ինչ որ կը խոչընդոտէ մամուլի
ազատութիւնը: Այս առումով յիշատակուած է կառավարութեան կողմէ «Թուիթըր»-ն ու «Եու
Թիուպ»-ը օգտագործելու արգելքի սահմանումը, որ հետագային վերցուեցաւ: Եւրոպական Միութիւնը
նշած է, որ կառոյցի հետ Թուրքիոյ բանակցութիւնները առաւել արդիւնաւէտ պիտի ըլլան, եթէ
Անգարան կատարէ իր պարտաւորութիւնները: